مشهد في سوبر ماركت- بين كاشير وعميلة
= كده 4670 جنيه يا فندم
- ده إزاي ؟
= مجرد إستفسار وهتدفعي ولا أزمة فقدان هوية المكانة فى الشريحة الإجتماعية المعتادة ؟
- لا منا لو دفعت كده الدنيا هتخرم معايا جامد
= تبقي أزمة الهوية المعتادة
- ده إيه ده ؟
= حضرتك بدون أى غلطة إرتكبتيها نزلتي درجة فى الترتيب الهرمي من الطبقة المتوسطة للطبقة الأدني
- أنا مش طبقة فقيرة
= هو مش عيب .. ب
- نعم ؟
= تلخيصا يعني هنسميها الطبقة المتشبثة
- تمام
= الطبقة دي تستدعي حاليا إننا نعمل مراجعة سريعة للأوردر وتعديله للتناسب مع حالة التشبث اللى حضرتك فيها
- ماشي
= عندك أول خطأ طبقي في أول الفاتورة فوق .. البهارات والتوابل المغلفة في علبة تجعل شكلها يبدو متناسقا علي رفوف المطبخ
- إيه الغلط فى التوابل دي حاجة تافهة
= كانت .. إنما حاليا علبة الفلفل الأسمر دي لوحدها ب45 جنيه .. واللي هي بتوازي نفس الكمية اللى بتقدر بحوالي 7 جنيه من عند أى عطارة .. بس الفرق الوحيد إنه هيديهالك فى كيس شفاف بدل العلبة المتزوقة
- ماشي بسيطة
= هنا حضرتك تقدري تستعملي أسلوب العلبة المارلبورو .. عارفاه ؟
- مبدخنش
= أسلوب العلبة المارلبورو هو أسلوب يتبعه أفراد الطبقة المتشبثة بشراء علبة مارلبورو واحده فى الشهر .. وباقي الشهر بيشتري كليوباترا عادي .. لكنه بيحتفظ بالعلبة المارلبورو الفاضية ويملاها سجاير كليوباترا .. حفاظا علي شكله الإجتماعي قدام الناس
- يعني أشتري البهارات من العطارة وأفضيها فى العلبة النضيفة الفاضية
= بالظبط كده
- تمام .. وفرنا كام ؟
= هنحتاج نشيل كمان البابريكا والكركم والزعتر والكاري .. لان كل دي رفاهيات فارغة بالنسبة لطبقتك الحالية .. ونكتفي فقط بالفلفل والشطة والكمون اللى هما أساس المطابخ ما قبل الإنترنت .. هتوفر معانا حوالي 350 جنيه
- حلو ده .. إللي بعده
= الشامبوهات والHand wash والBody lotion وال skin care و hair care وال body splash وكل هذه الرغوات
- لا دي حاجات مقدرش أستغني عنها .. شوف غيرها
= فاكره حضرتك أسلوب العلبة المارلبورو ؟
- لا دي عفانه بقي .. مش هجيب شامبو سايب أنا وأفضيه فى العلبة
= لا مقولتش لحضرتك كده خالص .. انتي طبقة أرقي من كده
- أومال
= هنتبع أسلوب مماثل بنسميه نحن معشر الرجال أسلوب " الأي رغوة يا عم "
- و ده إيه ؟
= أسلوب الأي رغوة يا عم بيتمثل في إن أى حاجة بتعمل رغوة فهي هدفها الوحيد الثابت علميا وفنيا وإستحماميا هو " النظافة " .. وطالما الرغوة بتنضف الإيد .. تبقي بتنضف الوش .. تبقي بتنضف الشعر تبقي بتنضف الجسم وأحيانا بتنضف الحلل والأرضيات لو إستلزم الأمر
- يا عم لأ يا عم
= البند ده لوحده لو قدرنا نتجاوزه هنوفر حوالي 1600 جنيه .. نكتفي بنوع شامبو واحد بس لعمل الرغوة .. ونكتفي بbody splash عشان ريحتك تبقي كويسة والناس متحسش بإختلاف ريحتك وتفقدي هويتك الإجتماعية
- هنوفر كام ؟
= 1600 يا فندم
- تمام شيل
= هايل .. طبعا الناجتس والإستربس والبرجر والوجبات سريعة التحضير اللى بنعملها بالليل واحنا بنتفرج علي مسلسل علي نتفلكس .. واللى لا منها محصلة وجبة أساسية فى اليوم ولا منها محصلة عشا جبنه و لانشون وطماطم .. هنحتاج نراجعها ونكتفي بحاجة واحده منهم ونزود جبن وزتون
- شيل
= الخمس طماطميات .. والخمس خيارات .. والخمس جزرات .. والخمس فلفلات اللى متغلفين فى طبق فويل وشكلهم حلو نقدر نجيب 3 أضعافهم بنص التمن لو نزلنا السوق علي أول الشارع وبطلنا مرقعة
- إحترم ذاتك
= نتشبث يا فندم
- شيل إخلص
= الفول بييجي من علي العربية أو مطعم الفول اللى جنبنا .. تعليب الفول ده جريمة توازي تعليب المسقعة والبصارة
- تمام
= يبقي نجيب الفول منين ونبطل مرقعة ونتشبث ؟
- من ع العربية
= وطعمة أفضل بأربعة مليار ضعف .. وعم صفوت بيدرمغه زيت حار ولمون وتوابل وممكن تخرم الكيس وتاكل فى الشارع في طقس مشابه لكيس الكشري من حلاوته
- مش هتوصل للدرجادي بس فهمت قصدك .. تمام
= مشاريب الطبقة المتشبثه هي شاي وقهوة ونسكافيه بس .. الشاي بالهيل والقهوة بالبندق والينسون بالليمون والأحيه بالكركديه كل دي مشاريب صايصة تستخدمها الطبقات الأعلي .. نكتفي بالشاي والقهوة والنسكافيه عشان الترمس اللى بتمليه وانتي نازلة الشغل
- إسمه thermal mug
= إحنا متشبثين .. يبقي ترمس
- تمام
= كده فاتورتنا وصلت 1860
- كده قليل أوي
= ده مرتب موظف فى الطبقة الكادحة .. بس بالنسبالك بقي عندك رفاهية إنك ترجعي عنصر أساسي من اللى تخليتي عنهم لجعلك تشعري إنك منزلتيش أى طبقات إجتماعية ويديلك شعور ولو كاذب إنك لسه في مكانتك
- حلو أوي .. رجعلي بقي ال
= وبما إنك أنثي ممكن متاكلش ولا تشرب بس برستيجها وريحتها تبقي تمام .. هترجعي الشامبوهات والبادي لوشن والرغوات اللى لغيناها كلها وترفضي مبدأ الأي رغوة يا عم
- بالظبط كده
= 3260 جنيه
- إتفضل
= مبسوطة ؟
- متشكرة جدا ليك
= نورتي .. المتشبث اللى بعدها إتفضل
تعليقات
إرسال تعليق